Во градината на земјоделецот Фиданчо Лазаров од делчевското село Град израснала тиква тешка 50 килограми. Иако долги години Лазаров се занимава со одгледување тикви, сепак, ова е најголемата тиква што се родила во градината на 68-годишниот земјоделец. Со гордост ја турка во количката, затоа што во селото Град досега толкава тиква не е собрана од нивите.

-Досега никогаш не сум нашол толку голема тиква на мојот имот. Ова е ново семе кое соседите ми го донесоа од Италија, а за следната година ќе нарачам уште. Ќе откријам една тајна, на тиквата и годи природна изворска вода, а не сака наводнување од водовод – вели Лазаров.

Лазарови уште не ја пробале тиквата. Велат, ако се погоди блага и вкусна, ќе заврши на семејната трпеза, а во спротивно ќе заврши како сточна храна за свињите.