текст и видео - Оливер АрсовскиИзградбата на мостот на Крива река кој треба да го направи локалитетот Камени кукли достапен за туристи, е во завршна фаза. Поројните дождови и надојдената Крива река пред две години го урнаа малиот импровизиран мост. Тоа им создаде проблеми на жителите на Куклица, но и на туристите кои беа принудени да пешачат и по неколку километри.
- Оваа година успеавме преку Министерството за транспорт и врски да обезбедиме околу 5.300.000 денари за изградба на сосема нов мост. Објектот е во напредна фаза, веќе се изградени столбовите и се надевам дека за еден месец ќе биде изградена и плочата на мостот, ќе се постави ограда и ќе биде пуштен во функција – истакна Мите Андоновски, градоначалник на Кратово.
Изградба на уште вакви мостови најави министерот за земјоделство, шумарство и водостопанство, Љупчо Димовски.
- Во програмата за рурален развој, следната година ќе бидат предвидени средства за изградба на помали селски мовчиња кои ќе бидат во функција на селаните и на развојот на селската општина – изјави министерот Димовски.
Локалитетот Камени кукли годишно го посетуваат неколку илјади туристи и влегува во туристичката понуда на Општина Кратово.