Ноќеска педесетина минути по полноќ избувнал пожар во еден од дуќаните наоѓаат на Градскиот плоштад во Пробиштип. Од пожарот биле зафатени три дуќани од кои една слаткарница, продавница за чевли и земјоделска аптека.

- По дојавата за пожар територијалната противпожарна единица беше активирана и за кратко време со три возила и осум пожарникари пристигнавме на местото на настанот. Пожарот кој имаше поголеми размери го локализиравме за еден час и не дозволивме негово ширење на околните дуќани, изјави Васе Митрев, командир на ТППЕ на Пробиштип.

Според Миливој Николовски, сопственик на слаткарницата, пожарот бил забележан од вработените и тоа во нивните простории.

- Дваесет години работам во овој дуќан и вакво нешто досега не се има случено, изјави Николовски.

На местото на настанот се наоѓаат увидни екипи кои ја проценуваат настаната штета, која според сопствениците на трите опожарени дуќани е мошне голема.