Шестчленото семејство Мустафови го затекнавме во нивниот дом во Кратово. Пожарот кој неодамна го пеплоса нивното трошно куќарче воопшто не оставил негативни последици врз лицата на шестгодишниот Дејар и тригодишната Нихана. Не пречекаа со насмевка на лицата, среќни што некој се сетил на нив и им однел храна, облека и играчки.
Најмалиот член на семејството Мустафови, шестмесечната Нериман ја затекнавме болна, со висока температура. Мајката Емрана се пожали дека сите дечиња се болникави бидејќи немаат влезна врата, а ноќите во Кратово знат да бидат доста свежи.
-Немаме фрижидер, машина за перење, а немаме ниту влезна врата и покрив над собата во која живееме. Им благодарам на сите што досега ни помогнаа – вели Емран Мустафова, мајка на четири дечиња.
Одбележувајќи ја неделата на солидарноста, Форумот на жени на СПМ и младинската организација од Кратово донираа храна, облека и хигиенски средства на семејството Мустафови. Притоа, упатија апел до сите граѓани да се вклучат во акцијата.
-Спроведувајќи ја политиката на Социјалистичката партија на Македонија, обезбедивме донација за семејството Мустафови која се состои од храна, облека и хигиенски средства. Би сакала да упатам апел до сите граѓани да ни се приклучат во акцијата за да обезбедиме нормални услови за живот на ова ромско семејство – истакна Гордана Накова од Форумот на жени на СПМ.
Топлото лето ќе им донесе на Дејар и Нихана среќни детски денови, а хуманоста на граѓаните, се надеваме, ќе им донесе покрив над домот и влезна врата пред дождливите и студени есенски денови.   Оливер Арсовски

ФОТОГАЛЕРИЈА   https://www.facebook.com/media/set/?set=a.10153982135833957.1073741919.155289693956&;type=3&uploaded=10