Тежок е фудбалскиот леб, горчлива знае да биде судбината на спортистите. Го искусиле тоа многумина, еден од нив, за жал, е и младиот перспективен голман Кристијан Стоилков. Да, тоа е истиот оној со кој порталот „Аберџија“ на 13 декември направи интервју, во кое младиот дваесетгодишен беровец бликаше од позитивна енергија, со големи планови за фудбалската иднина. Но, сите тие планови пукнаа како меур од сапуница кон крајот на јануари, при еден несреќен судир со Иван Митров, на пријателскиот меч Хоризонт Турново - Брегалница. Страшниот удар во главата остави тешки последици за Кико, кој заврши на оперативна маса, во борба за гол живот. Само брзата интервенција на лекарите му го спасија животот, но не му ја вратија подвижноста. Кико по операцијата не може да ја движи левата рака и нога и му се заканува предвремен крај на голманската кариера.
Гратис лекувањето на државна сметка заврши, сега е потребна и неопходна рехабилитација во специјализиран центар во Словенија, а пари нема. Семејството на Кико е во неможност да ги покрие трошоците, клубот Хоризонт се обидува да помогне, но има финансиска криза во моментов, а животот и кариерата на Кико е во рацете на хуманите граѓани.
„Подршката многу ми значи, иако ја имам само од моите најблиски и клубот. Минав низ пеколен период. Сега сум подобро благодарение на комплетниот лекарски тим тука, во болницата во Охрид. Тие го спасија мојот живот и на нив сум им вечно благодарен. Но, мојата битка не е завршена. Допрва следува најтешкиот дел. Но, сакам пак да бранам, сакам да сум во фудбалот затоа што тоа е мојата најголема љубов. Знам и свесен сум дека ќе биде тешко да се вратам, но ќе се борам!“, најавува Стоилков.
Јавноста почна да се мобилизира и почнаа да стигаат првите донации. Први ќе помогнат фудбалските репрезентативци и стручниот штаб, кои средствата во висина од 10.000 евра кои им следуваат за повик во репрезентацијата за следниот пријателски меч, ќе ги донираат на Кико. Не би било лошо и фудбалските делегати на претстојното Генерално собрание на фудалската федерација да се откажат од една дневница и да му помогнат на несреќниот голман. Вистински потег би повлекол и претседателот на ФФМ, Илчо Ѓорѓиоски, ако еден мал дел од својата плата тешка 250.000 денари ја пренасочи за лекување на Кико. Очекувам и великанот на македонскиот фудбал, Дарко Панчев, кој претендира да ја преземе федерацијата, да покаже дека во џебот нема „кобра“, туку добрина и хуманост.
За почеток, прошетајте до најблиската банка и парите предвидени за петочен тикет во обложувалници пренасочете ги за Кико. И онака тикетот веројатно ќе ви биде недобитен, а за Кико може да значи зрак надеж во битката за враќање на фудбалските терени.  Оливер Арсовски
Стоилков Кристијан
Централна Кооперативна Банка
320 5000 252 697 42

http://www.aberdzija.com/zabava/kristijan-stoilkov-golman-na-koj-mu-predviduvaat-bleskava-kariera.html