Советот на општина Крива Паланка донесе одлука за задолжување на општината со краткорочен заем во земјата во максимален износ до 1.968.000 денари заради имплементација на проектот „Јавните институции – енергетски ефикасни“. Заемот кон финансиска институција ќе се реализира по претходно добиено позитивно мислење од Министерството за финансии и Одлука за задолжување од Владата на Република Македонија.
Проектот „Јавните институции – енергетски ефикасни“ е финансиран од ИПА Програмата за прекугранична соработка помеѓу Република Бугарија и Република Македонија, а имплементатор е основното општинско училиште „Илинден“ од Крива Паланка. Со него во Крива Паланка ќе биде изготвена техничка документација за енергетска ефикасност на општинската зграда, на основните и средните училишта, на градинката, Градскиот музеј и општинскиот ученички дом.
Општината има рок за исплата на заемот од една година и грејс период од 6 месеци. Исплатата на заемот ќе биде извршена од ИПА Програмата за прекугранична соработка помеѓу Р.Бугарија и Р.Македонија, а исплатата на каматата имплементаторот на проектот, ООУ „Илинден“.
