Општина Пробиштип петти пат беше домаќин на манифестацијата „Зелникот на баба“, која од година во година станува сѐ помасовна. Благодарение на вредните раце на домаќинките, на богатата трпеза на плоштадот во Пробиштип гостите можеа да вкусат зелник, јајчаник, мантија, колпиде, штрудла со јаболка и редица други специјалитети. Сето тоа брзо се продаде, за петнаесеттина минути, а собраните средства му беа отстапени на организаторот, кој ги намени за хуманитарни цели.
-Со добра организација и добар маркетинг, од оваа манифестација успеавме за пет години да направиме нов бренд на Пробиштип. Поентата ни е да се потсетиме, но и да се навратиме на старите добри традиции во гастрономијата на нашите предци, на зелникот кој го меселе нашите баби и таа традиција да се пренесе на младите генерации – вели Радослав Илиевски, промотор на оваа манифестација.
Оваа манифестација од година во година зема сѐ поголем замав. На тезгите се најдоа најубавите македонски традиционални специјалитети и сѐ е приготвено по оригиналните рецепти. Можеа да е забележат штандови со храна од речиси сите градови на североистокот, кои се продаваа по симболична цена. На манифестацијата „Зелникот на баба“ настапија повеќе фолклорни друштва од земјава, пеачката Блага Петреска, а присуствуваше и премиерот Емил Димитриев.
автор: О.А.
фотографија: Оливер Арсовски

ФОТОГАЛЕРИЈА на следниот линк- http://www.facebook.com/%D0%90%D0%B1%D0%B5%D1%80%D1%9F%D0%B8%D1%98%D0%B0-Aberdzija-news-portal-155289693956/photos