На Силекс воопшто не му цветаат рози на стартот од новата сезона, за што најдобар показател е табелата на која кратовци се при самото дно, со две победи и дури пет порази. Премалку за амбициите на трофејниот кратовски прволигаш, кому местото не му е на дното од табелата. Потребни се бодови, а првата прилика за подобрување на бодовното конто кратовци ќе ја имаат утре против скопски Работнички. Оптимизам има, се гради победничка атмосфера, но сето тоа треба да се пренесе на терен.

-Дуелот со Работнички е од огромно значење за нас, бидејќи доаѓа во мигови кога не ни оди баш најдобро. Потребни се бодови, се сложувам дека шест бодови од седум меча е премалку. И Работнички е во криза, ќе биде тоа тежок меч дефинитивно. Рецептот за победа го знаеме, сите треба да одиграме на максимално ниво и да ги следиме советите на стручниот штаб и бодовите ќе останат во Кратово. Јас се надевам дека токму со мој погодок во мрежата ќе славиме и така ќе стигнам до вториот првенствен гол оваа сезона - ни изјави младиот напаѓач на Силекс, Дарко Грозданоски.

Мечот се игра во недела со почеток од 15.00 часот, а главен судија ќе биде охриѓанецот Марјан Ецкоски.