Силекс нема изразити класични напаѓачи, па во една таква ситуација мора да се потпира на голгетерските квалитети на полушпицовите и крилата. Еден таков во редовите на Силекс е струмичанецот Филип Тимов, од кого се очекува многу на денешниот меч со првакот Вардар. Скопјани на последните четири меча (три во првенството и еден во ЛЕ) примија неверојатни 12 погодоци, или во просек три по меч. Тоа е добрата вест за напаѓачите на Силекс, очигледно е дека одбраната на Вардар е раштимана и шуплива како „швајцарско сирење“. Тоа добро го знае и Филип Тимов, од кого се очекува погодок против шампионот.
-Против фаворит како што е Вардар, други избор немаме, освен да одиграме храбро, „машки“ и да изгинеме на теренот. Ние се подготвувавме за овој меч, ваквите мечеви се чекаат со душа. Посебно за нас напаѓачите мечевите против шампионот се вистинска инспирација. Гол против Вардар не е обичен гол, туку има посебно значење. Ќе се потрудам максимално мотивиран да влеам во мечот и да го надмудрам голманот Гачевски - вели полушпицот Филип Тимов, кој во претходнотот коло го постигна победничкиот гол во Битола.