Во меч кој требаше да биде „генерална проба“ пред стартот на пролетната полусезона, фудбалерите на Брегалница беа поуспешни од Силекс и победија на свој терен со минимални 1-0. Голот падна во 60-та минута, а стрелец беше Ристе Наумов. Сепак, во таборот на кратовци владее мало незадоволство, не толку од резултатот, колку од односот кон нив од страна на домаќините.
-Сите 90 минути бевме под силен притисок од домаќинот, иако се работеше за пријателски меч. Впрочем, мечевите меѓу Силекс и Брегалница ретко кога биле пријателски, секогаш имало тензии, но овојпат имавме впечаток дека штипјани сакаат по секоја цена да победат. Имам големи забелешки и на судиите, кои судеа во корист на домаќинот и кумуваа на погодокот -  истакна напаѓачот на кратовци Стојанче Велинов.
Кратовци следниот викенд гостуваат во Миравци, а Брегалница го пречекува лидерот Хоризонт Турново.  Оливер Арсовски