Тренерот под чија палка фудбалерите на Силекс обезбедија експресно враќање во елитното друштво, нема да ја има привилегијата да ги води кратовци низ прволигашките искушенија. Штипјанецот Трајче Сенев веќе не е шеф на стручниот штаб на Силекс, а причината е по малку банална, немање Про-лиценца за водење прволигашки клуб. Да ја имаше потребната лиценца, Сенев веројатно ќе добиеше шанса да остане на клупата и за првпат да води клуб во елитната конкуренција.

Во ситуација кога фотелјата е испразнета, на чаршијата и останува да шпекулира околу имињата кои би можеле да седнат на жешката клупа. Се вртат имињата на Добринко Илиевски - Пижон, екс-играчот на Силекс Зоран Штерјовски, Ѓорѓи Тодоровски - Џони, па се до Љубодраг Милошевиќ и Ане Андовски.