Наместо второто полугодие во училиштата да започне на 18 јануари, тоа ќе започне на 23 јануари поради ситуацијата со грипот во државава. Ова на прес конференција го изјави министерот за здравство Никола Тодоров.

„Донесовме мерка за продолжување на зимскиот распуст до 23 јануари. Оваа мерка е повеќе од потребна, имајќи ја предвид тенденцијата на намалување на заболени од грип од нула до 14 години во време на распустот“, изјави Тодоров.

Покрај оваа мерка, секојдневно ќе се врши и темелна дезинфекција на организираниот јавен сообраќај во државата, а пред почетокот на второто полугодие ќе се изврши и темелна дезинфекција на сите училишта.