Македонскиот тим „Farmarket“ го освои второто место за најдобра мобилна апликација доделена од светскиот бренд Ericsson, пренесува Капитал.

Во Стокхолм, Шведска денес наградата ја примија Игор Мишевски и Гордана Мишевска, сопственици на компанијата „Nova Solutions” од Битола која ја изработи апликацијата „Farmarket”. Тимот „Farmarket“ го предводат Мишевски и неговиот партнер, Александар Балаловски, програмер за мобилни апликации, кои се и главни креатори на апликацијата.

Иноваторите на оваа апликација велат дека цел на апликацијата е да го помести јазот помеѓу купувачите и производителите на прехрамбени производи. Апликацијата им овозможува на семејствата, компаниите и рестораните да се поврзат со локалните фармери од кои може да порачаат прехрамбени производи. Оваа апликација може да функционира во цел свет, и токму затоа иноваторите сметаат дека има голем бизнис потенцијал.

„Наше мото е дека постојано треба да иновираме и да излегуваме од комфорната зона за да креираме производ кој ќе биде корисен за целната публика. Во оваа фаза, Farmarket се уште е во развојна фаза, а ние забрзано бараме инвеститори кои би помогнале побрзо да ја лансираме апликацијата на пазарот“, вели Игор Мишевски, иноватор на апликацијата.

Според Балаловски, развојот на Андроид апликација не е како останатиот развој на апликации.

„Развојот на Андроид апликациите не е сувопарен и едностран, туку е брз и динамичен и се менува секојдневно. Андроид како платформа или ја сакаш или воопшто не ти се допаѓа. Не постои средина кога на Андроид се гледа од технички аспект во смисла на разбирање и манипулирање со платформата “ - изјави Александар Балаловски, главен програмер на Farmarket.