Одамна немало таква ерупција на радост на стадионот во Кратово. По 14 меча без триумф над својот најлут ривал, Силекс не само што го порази Вардар, туку го фрли на колена, му одржа лекција, му даде три гола како никој сезонава. Да не беше тенденциозното судење на Бартон, кратовци ќе славеа многу поубедливо, но и вака победата е слатка. Знаеја кратовци да прослават по мечот, дури и газда Ѕинго, покрај своите 80 години, стана за да им ракоплеска за демолирањето на шампионот. Капитенот Мицков, во мигови на егзалтација, се качи на џипот кој го користи газда Ѕинго и направи неколку крукчиња по теренот, кревајќи ја атмосферата до вриење.