Откако минатата недела порталот www.aberdzija.com ја објави веста за џиновскиот домат од 1.3 килограми произведен во Кратово, денеска наш читател ни испрати фотографија од уште еден „џамбо-патлиџан“ произведен во нашиот град. Вредните домаќини Богица и Добре Ивановски од населбата „Мусала“ викендов скинале домат тежок 1 кг и 100 грама, каков досега никогаш немале во нивната градина.

Бидејќи бабите и дедовците секогаш сакаат да им угодат на зетовците, така и овојпат честа прв да ја проба салатата од гигантскиот патлиџан ја имаше градоначалникот на Кратово, Мите Андоновски, кој е зет во семејството на Ивановски. Соседите на Ивановски дури и побарале „семе“ од популарниот „градоначалнички“ домат, надевајќи се на богат род догодина.